Këtyre ditëve në komunën e Rahovecit filloi realizimi i projektit ambientalist, me fokus të veçantë mbrojtjen e rrjedhave ujore dhe të lumenjve në disa rajone të kësaj komune. Shqetësimi në rritje për ndotjen e rrjedhave ujore dhe shkatërrimin e shtretërve të lumenjve, shkatërrimin e florës dhe faunës në këtë rajon, ka nxitur shoqërinë civile për të reaguar me qëllim të sensibilizimit të opinionit për mbrojtjen e këtyre pasurive kombëtare.
Qëllimi i këtij projekti është të bëjë; Identifikimin e shkaktarëve të ndotjes së ujërave, hartimin dhe publikimin e metodave mbrojtëse të shtretërve të lumenjve, adresimin e shkaktarëve degradues tek organet kompetente vendore dhe nderkombëtare, diskutimin e problemeve të identifikuara; përmes tryezave, punëtorive dhe publikimeve të ndryshme. Fokusi i këtij projekti do të jenë rrjedhat ujore në Rahovec (Lumi Duhllo dhe Rimnik), në fshatin Sopniq (Lumi Sopniq) dhe në fshatin Fortesë (Lumi Bellaja). Projekti mbeshtetet nga “CRESSIDA, REC- Kosova”, ndërsa realizimin do ta bëjë OJQ “KRR” (Këshilli Rinor i Rahovecit)./PrizrenPrss.com/