Stefano Pioli vijon të mos bindë plotësisht Suning. Me të në drejtimin e stolit kanë ardhur rezultate të mira, por grupi kinez që menaxhon Inter-in do të donte një profil më të rëndësishëm për rinisjen e zikaltërve në skenat e mëdha europiane.
Në këtë pikë po vlerësohen mundësitë për sezonin tjetër dhe në krye të listës së preferencave figurojnë emra të rëndësishëm duke nisur nga Conte, Simeone, por edhe Sampaoli e Spalletti. Ish-trajneri i Juventus-it, pas fitores 2-1 ndaj Manchester City-t të mërkurën ka hedhur një tjetër hap drejt titullit të Premier League-s.
“Tani po luftojmë me shpirt ndër dhëmbë për të arritur atë që nuk e kishim pritur, më tej do të punojmë për të ndërtuar diçka të rëndësishme për sezonin pasardhës”, ka thënë ish-trajneri i Italisë duke e bërë të qartë dëshirën e tij për të vijuar bashkëpunimin në Stamford Bridge.
Përvec Antonio Conte-s, Zhang po vlerëson edhe profile të tjera. Simeone i cili ka premtuar se do të qëndrojë te Atletico kërkohet me ngulm nga Zanetti dhe mund të mos refuzojë për arsye zemre dhe projekti. Në ditët e fundit kanë dalë edhe emrat e Sampaoli-t dhe Spalletti-t. Tekniku argjentinas po bën mirë me Sevilla-n dhe ka një eksperiencë të madhe, ku spikat ajo me Kilin me të cilin fitoi Kupën e Amerikës Latine në 2015-ën. Për sa i takon Spalletti-t, 58-vjeçari duhet t’i japë lamtumirën Roma-s në fund të sezonit dhe është gati të dëgjojë për oferta të reja. Pra një situatë e ndërlikuar për Piolin që për të merituar konfirmimn duhet ta mbyllë bukur kampionantin. Një mision jo i lehtë, por as i pamundur.