Drejtori i Drejtorisë Komunale të Arsimit (DKA) në Suharekë, Sherif Berisha, i akuzuar se ka keqpërdorur pozitën e tij zyrtare duke punësuar mësimdhënës pa konkurs, të premten, ka thënë se ka vepruar në të mirë të nxënësve.
Berisha, gjatë mbrojtjes së tij, të dhënë para trupit gjykues, në Gjykatën Themelore në Prizren, ka thënë se obligim i drejtorisë që udhëheqë është që të sigurojë hapësirë dhe mësimdhënës për të shkuar mirë procesi edukativo-arsimor. Andaj sipas tij edhe punësimi i mësimdhënësve që përmend aktakuza, është bërë në kuadër të këtij obligimi. Kjo sepse, sipas Berishës, pas regjistrimit të nxënësve në shkolla, janë shtuar disa orë mësimore andaj ka pasur nevojë urgjente për të gjetur mësimdhënës.
I akuzuari Berisha tutje ka thënë se në momentin kur drejtorët e shkollave kanë kërkuar urgjent mësimdhënës, DKA-ja ka pasur një listë të pritjes e cila ishte formuar nga konkurset paraprake. I njëjti shtoi se nga ajo listë ka punësuar mësimdhënësit, përkohësisht deri sa të pranohen mësimdhënësit me konkurs. Ai ka thënë se ka kontakte edhe me DKA-të e komunave tjera dhe të njëjtat, në raste urgjente, veprojnë njëjtë.
I akuzuari tutje ka shtuar se në disa raste, për të cilat flet aktakuza, janë bërë transferime të mësimdhënësve nga një shkollë në një shkollë tjetër, në bazë të kualifikimit profesional. Sipas tij, një gjë të tillë e lejon Ligji i Punës dhe Udhëzimi Administrativ 14/2011 për arsimin para universitar.
Kryetarja e trupit gjykues, Raime Elezi, ka ndërprerë seancën sepse ka pasur të caktuar një rast tjetër me paraburgim. Seancën e radhës e ka caktuar për 13 prill 2017, në ora 13:15, në të cilën do të vazhdojë mbrojtjen i akuzuari Berisha.
Sherif Berisha akuzohet se duke qenë drejtor i arsimit në Komunën e Suharekës, gjatë periudhës 2014-2016, ka punësuar në shkollat e Komunës së Suharekës, pa konkurs, nëntë mësimdhënës dhe një kontabilist.
Sipas aktakuzës, i akuzuari me këto veprime ka kryer veprën penale të keqpërdorimit të detyrës zyrtare dhe cenimin e të drejtave të barabarta në punësim të personave tjerë./betimiperdrejtesi/