Mungesa e të akuzuarit Gjon Krevja nga Shqipëria, është bërë shkak për shtyrjen e shqyrtimit fillestar ndaj tij dhe të akuzuarës tjetër, Kristina Zefi, për transport dhe shitje të narkotikëve.
Shqyrtimi ishte paraparë të mbahej të mërkurën, por një gjë e tillë është pamundësuar pasi që i akuzuari Krevja, i cili gjendet në burgun e Dubravës, ka refuzuar të vijë me arsye se është i sëmurë.
Në Gjykatën Themelore në Prizren, është paraqitur prokurori i rastit, Mehdi Sefa, e akuzuara Krisitina Zefi me mbrojtësin e saj, avokatin Skender Morina, po ashtu është paraqitur edhe mbrojtësi i të akuzuarit Gjon Krevja, avokati Betim Shala.
Kryetari i trupit gjykues, Artan Sejrani, ka njoftuar palët se para se të fillonte seanca ka biseduar me zyrtarin e burgut të Dubravës, i cili e ka njoftuar se i akuzuari në fjalë ka refuzuar që të transportohet me makinën e burgut, me arsye se është i sëmurë.
Në këto rrethana, Sejrani, ka shtyrë shqyrtimin fillestar për 28 qershor 2017, në ora 09:30.
Gjon Krevja dhe Kristina Zefi akuzohen nga Prokuroria Themelore në Prizren se në bashkëveprim edhe me të akuzuarin Afrim Milla, i cili po gjykohet në një gjykim të ndarë, kanë transportuar narkotik të llojit marihuanë nga Shqipëria për në Kosovë.
Sipas aktakuzës, të akuzuarit kanë pritur brenda kufirit të Kosovës, ndërsa të akuzuarin Afrim Milla, e kanë dërguar në pjesën tjetër të kufirit për të marrë narkotikun në sasi prej 39 kg, i njëjti e ka marrë atë dhe ka tentuar të kaloi kufirin në këmbë. Derisa i akuzuari Milla, po e kalonte kufirin në këmbë me tre thasë marihuanë, përmes liqenit të Vërmicës, është hasur nga Policia e Kosovës dhe i njëjti ka lëshuar thasët dhe ka filluar të ikë. Duke vrapuar ka komunikuar në telefon me dy të akuzuarit Gjon Krevja dhe Kristina Zefi, të cilëve u ka treguar se është nxënë nga policia.
Të gjitha bisedat në mes tyre policia i ka të regjistruara, pasi që telefonat e të akuzuarve, me vendim të gjykatës, po përgjoheshin./betimiperdrejtesi/