Qendra Rajonale për Trashëgiminë Kulturore në Prizren ka filluar restaurimin e shtëpisë së familjes Kabashi në Prizren.
Sipas një njoftimi për shtyp të kësaj qendre, ky restaurim kryhet në kuadër të zbatimit të projekteve për ndërhyrje konsoliduese, restauruese dhe konservuese për objektet e trashëgimisë të rrezikuara.
“Një nga tipologjitë më të rrezikuara të shtëpive nga zhdukja totale janë shtëpitë me çardak të hapur në gjithë pjesën e përparme të banesës. Është interes parësor që edhe ky tip i shtëpive të ruhet dhe të promovohen ndërsa në Prizren kanë mbetur jo më shumë 5-6 të tilla. Një nga këto është shtëpia e familjes Kabashi.”, thuhet në njoftimin për shtyp.
Banesa i takon fundit të shekullit XVIII, e cila është restauruar gjatë shek XIX dhe XX.
“Nuk dihet se kush ka qenë ndërtuesi ose pronari i parë i kësaj shtëpie, por dihet se ajo është shfrytëzuar (blerë) nga Durmish Hapçiu në çerekun e fundit të shekullit XIX. Me ndarjen e trashëgimisë gjysmën e shtëpisë e trashëgon e bija, Fatime Hapçiu – Kabashi të cilën më pas e trashëgojnë fëmijët e saj. Gjysma tjetër e shtëpisë (në anën perëndimore) shitet në vitin 1956 të cilën pronarët e rrënojnë dhe ndërtojnë një godinë të re në fund të shekullit XX. Për fat të mirë trashëgimtarja e pjesës tjetër të banesës e ka ruajtur me fanatizëm thuajse të gjithë elementet (origjinale) që ka pasur deri në atë kohë”, theksohet në njoftim.
Sipas QRTKP, ky restaurim vjen si rezultat i nevojës së domosdoshme për ta mbrojtur këtë shtëpi banimi, e cila është karakteristike për trashëgiminë arkitekturore në qytetin e Prizrenit.