Me 4 vite e 6 muaj burgim efektiv dhe 2 mijë euro gjobë është dënuar Mehmed Jonuzi, për posedim, shpërndarje dhe shitje të substancës narkotike e llojit marihuanë.
Në seancën e mbajtur të premten në Gjykatën Themelore në Prizren, prokurori i rastit Mehdi Sefa ka lexuar aktakuzën, ndërsa i akuzuari Jonuzi, pas konsultimit me mbrojtësin e tij, avokatin Hajrip Krasniqi, ka pranuar fajësinë për akuzën që i ngarkohej.
Me këtë rast, trupi gjykues i kryesuar nga gjyqtari Skender Çoçaj, ka aprovuar pranimin e fajësisë nga i akuzuari Mehmed Jonuzi dhe të njëjtit i është shqiptuar dënimi i lartcekur dhe njëkohësisht është konfiskuar sasia prej 51 kg e narkotikut e llojit marihuanë.
Ndërsa, i akuzuari është liruar nga paraburgimi, derisa aktgjykimi të bëhet i plotfuqishëm.
Ky rast zhvillohej në bazë të aktakuzës së Prokurorisë Themelore në Prizren, e cila e ngarkonte Mehmed Jonuzin me veprën penale “blerja, posedimi, shpërndarja dhe shitja e pa autorizuar e narkotikëve, substancave psikotrope dhe analoge”.
Sipas aktakuzës, më 30 nëntor 2016, rreth orës 18:30, gjatë bastisjes së shtëpisë së të akuzuarit nga ana e policisë, është gjetur substancë narkotike e llojit marihuanë në sasi prej 51 kilogramësh dhe dy peshore digjitale.
I njëjti, gjendej në paraburgim që nga momenti i arrestimit me rastin e bastisjes./betimiperdrejtesi/