Sekretari i Përgjithshëm i Aleancës për Ardhmërinë e Kosovës, Blerim Kuçi ka thënë se konstituimi i institucioneve nuk do të vonohet siç kishte ndodhur pas zgjedhjeve të vitit 2014, megjithatë ai ka thënë se është edhe në dorën e opozitës, (e që sipas tij janë Lëvizjes Vetëvendosje dhe të koalicioni LDK-AKR), që të mos të ketë bllokadë institucionale.
Ai ka thënë për lajmi.net se edhe subjektet opozitare duhet ta mbështesin zgjedhjen e kryetarit të Kuvendit nga koalicioni PDK-AAK-Nisma (PAN), pasi ky post në aspektin kushtetues i takon këtij koalicioni.
“Nuk ka me zgjatë shumë çështja e konstituimit të institucioneve, por kjo çështje sigurisht se është edhe në dorën, kushtimisht po e them, të opozitës. Në aspektin kushtetues PAN-it i takon kryetari i Kuvendit dhe duhet të lëvizet tutje. Kurse sa i përket konstituimit të Qeverisë është një procedurë ligjore, ku çdo njëri e ka afatin e vet”, ka deklaruar Kuçi.
Ai më tej ka thënë se nuk mund të thuhet se ky koalicion nuk i ka votat, pasi ende nuk është hy në votim për ta vërtetuar një gjë të tillë. Sidoqoftë ai thotë se vullneti i mirë për zhbllokimin e funksionalitetit të shtetit nënkupton votimin e kryetari i Kuvendit nga radhët e koalicionit fitues.
“Vullneti i mirë do të ishte që për ta liruar funksionimin e shtetit, të votohet kryetari i Kuvendit. Na kujtohet neve kur ishin si koalicion VLAN, atëherë Gjykata Kushtetuese e kishte sjellë vendimin që partisë fituese i takon kryetari i Kuvendit. Nuk e di pse po luhet me këtë lojë tani nga subjektet që më shumë po akuzojnë për bllokadë e në fakt ato po marrin veprime që janë dëm të funksionimit të shtetit”, ka shtuar Kuçi