Prizreni në ditën e dytë të këtij viti ishte tronditur nga një vrasje e rëndë. Një zënkë ndërmjet dy personave në lokalet e Qendrës Tregtare “Ben-af”, kishte përfunduar tragjikisht me një të vdekur. Kjo vrasje ishte vlerësuar si një lajm i keq për fillimin e këtij viti në Prizren.
Tetë muaj pas kësaj vrasje të parë, policia vlerëson se në rajonin e Prizrenit, sivjet ka rënë numri i vrasjeve. Zëdhënësi i PK-së, Hazir Berisha tha se gjatë këtyre muajve në rajonin e Prizrenit janë shënuar vetëm 4 vrasje. Sipas tij, krahasuar me vitin e kaluar numri i vrasjeve ka shënuar rënie. ” Sivjet kemi pasur vetëm 4 vrasje, kurse vitin e kaluar janë shënuar 14 sosh”, tregon Berisha.
Ai vlerëson se situata e sigurisë në rajonin e Prizrenit, gjatë këtyre muajve ka qenë e qetë dhe stabile. “Nëpërgjithësi situata e sigurisë vlerësohet se është e qetë dhe stabile. Shpresojmë se edhe ky vit do të përmbyllet mirë dhe pa incidente të rënda”, tha Berisha.
Numri i vdekjeve në tetë muajt e këtij viti ka shënuar rënie edhe në aksidente të trafikut. Zëdhënësi i PK-së,Berisha tha se pavarësisht aksidenteve në trafik, gjatë këtyre muajve janë shënuar vetëm 9 vdekje. “Ende nuk është përmbyllur ky vit, por deri më tash në komunikacion kemi pasur 9 vdekje, ndërkaq vitin e kaluar kemi pasur 24 vdekje në trafik “, tha Berisha./ PrizrenPress.com/