Në kuadër të realizimit të projekteve kapitale, përkatësisht rregullimit të infrastrukturës së përgjithshme në Komunën e Malishevës, e në veçanti infrastrukturës rrugore, është duke vazhduar rregullimi-asfaltimi i rrugëve, kryesisht në brendi të fshatrave, duke mundësuar lidhjen e lagjeve mes vete dhe me shiritat kryesor të rrugëve.Vetëm brenda katër ditëve, janë asfaltuar tri rrugë në brendi të fshatit Astrazup, duke mundësuar lidhjen e disa lagjeve me rrugën kryesore, përkatësisht magjistralen Prishtinë-Rahovec-Prizren-Gjakovë, që kalon nëpër këtë fshat dhe në të njëjtën kohë, lidh fshatin me qendrën komunale të Malishevës dhe lagjet mes vete.
Po ashtu, duke filluar nga sot, ka filluar edhe shtrimi i rrugës në fshatin Dragobil, rrugë e cila lidh pjesën më të madhe të fshatit me shkollën dhe kjo rrugë e mundëson shkuarjen e nxënësve në shkollë, më lehtë, më shpejt dhe me më pak rrezik gjatë lëvizjes. Kjo rrugë, po ashtu lidh magjistralen Prishtinë-Rahovec, me rrugën Dragobil-Pagarushë-Therandë dhe me qendrën komunale të Malishevës.
Në asfaltim e sipër janë edhe rreth dyzet rrugë të tjera, në tërë territorin e Malishevës, gjegjësisht të 44 rrugëve, të planifikuara për asfaltim gjatë këtij viti dhe një pjesë në vitin 2014, ndërsa rregullimi i këtyre rrugëve, ishte planifikuar nga buxheti komunal për vitet 2013-2014 dhe një pjesë nga Ministria e Transportit dhe kapin një shumë prej rreth një milion euro.Asfaltimi dhe lidhja e rrugëve në brendi të vendbanimeve në tërë territorin e Malishevës, është edhe një nga premtimet e realizuara të qeverisë komunale, të udhëhequr nga Kryetari i Malishevës, z.Isni Kilaj, në mandatin e dytë udhëheqës të Komunës së Malishevës./prizrenpress.com/