Mungesa e anëtarit të trupit gjykues, është bërë shkak për mos fillimin e gjykimit ndaj zëvendëskomandantit të Stacionit Policor në Dragash, Eljam Seferit, i cili akuzohet për keqpërdorim të pozitës apo autoritetit zyrtar.
Seanca ishte paraparë të mbahej të premten, në Gjykatën Themelore në Prizren, por kryetari i trupit gjykues, Artan Sejrani, ka njoftuar se seanca nuk do të mbahet sepse anëtari i trupit gjykues, Xheladin Osmani, i është nënshtruar një intervenimi kirurgjik.
Sejrani ka thënë se seanca e radhës do të mbahet më 5 dhjetor 2017, në ora 10:00 dhe se për një ndryshim të tillë janë njoftuar me kohë të gjitha palët.
Ndryshe, Prokuroria Themelore në Prizren e akuzon Eljami Seferin se gjatë zbatimit të një urdhër-arresti të lëshuar nga Gjykata Themelore në Prizren, nuk i ka përmbushur detyrat e tij zyrtare, me qëllim që t’i shkaktoj dobi personit tjetër.
Sipas aktakuzës, i akuzuari Seferi, më 1 qershor 2017, së bashku me zyrtarë tjerë policor, ka shkuar në shtëpinë e Mexhait Qerimit në fshatin Bresanë të Komunës së Dragashit, për ta arrestuar sipas urdhëresës së gjykatës, por ka lejuar që i njëjti të arratiset.
Në aktakuzë thuhet se i akuzuari Seferi pasi ka biseduar me Mexhait Qerimin rreth çështjes së arrestimit të tij, ka lejuar që i njëjti të futet në shtëpi, me pretekst që të përgatitet dhe më pas ai është arratisur.
Gjithnjë sipas aktakuzës, i akuzuari Seferi nuk ka urdhëruar bastisjen e shtëpisë, objekteve përcjellëse dhe kërkimin e tij, por pa lënë patrullë policore për të vëzhguar shtëpinë, e urdhëron ekipin policor që të largohet nga vendi i ngjarjes./betimiperdrejtesi/