Autoritetet komunale të Dragashit kanë bërë të ditur se si pasojë e reshjeve atmosferike të ditëve të fundit ka pasur rrëshqitje të dheut dhe çarje në pjesë të rrugës Zaplluxhë-Prizren, projekt ky që ishte përuruar në verë të vitit të kaluar si rezultat i investimeve të Ministrisë së Infrastrukturës.
Sipas drejtuesve të kësaj komune, ministria përkatëse është njoftuar me ndodhitë e fundit në pjesë të kësaj rruge dhe është kërkuar intervenimi sa më i shpejtë, shkruan sot Koha Ditore.
Në anën tjetër, zyrtarët e MI-së kanë bërë të ditur se mirëmbajtja rutine e kësaj rruge nuk është nën kompetencat e këtij dikasteri qeveritar dhe se është përgjegjësi e komunave të Prizrenit dhe asaj të Dragashit, derisa kanë konfirmuar se në këtë segment janë duke analizuar intervenimin e mundshëm në hyrje të fshatit Lez të Prizrenit, ku sipas tyre ka ndodhur një rrëshqitje për shkak të reshjeve atmosferike dhe terrenit malor.