Anëtarët e Kuvendit të Komunës së Prizrenit pas diskutimeve të shumta dhe paqartësive lidhur me rezultatin e votimit kanë miratuar vendimin për rishqyrtimin e aktit komunal të aprovuar në shkurt të këtij viti për emërimin e anëtarëve të Komitetit për Politikë e Financa.
Kryesuesi i Kuvendit, Artan Abrashi, në fillim të shqyrtimit të kësaj pike ka sqaruar se rishqyrtimi është kërkesë e MAPL-it për shkak se akti komunal i miratuar më parë nuk ka qenë në përputhje me dispozitat e Ligjit për barazi gjinore, shkruan sot Koha Ditore.
Me këtë rast ai ka kërkuar nga njëri prej subjekteve të përfaqësuara në KPF që një anëtar burrë ta zëvendësojnë me një anëtare grua, ashtu që vendimi të jetë në përputhje me Ligjin për barazi gjinore.