Liverpool do të përballet me Romën në gjysmëfinale të Ligës së Kampionëve dhe vlerësimet e para janë se skuadra angleze pati fat në short. Mirëpo, trajneri Jurgen Klopp nuk mendon aspak kështu.
“Nëse dikush mendon se është shorti më i lehtë, atëherë unë nuk mund ta ndihmoj atë person. Ndoshta nuk i ka parë dy ndeshjet ndaj Barcelonës. Rezultati i ndeshjes së parë (4:1) nuk ishte pasqyrim real i ndeshjes së zhvilluar. Ishte një gjeni si Messi kundër një skuadre të mirë si Roma. Ndeshja e kthimit ishte e mrekullueshme. E jashtëzakonshme. Mund të kishin fituar ndoshta edhe me 4 ose 5 me 0. Ishte tejet impresionuese”, ka thënë tekniku gjerman.
Ai ka shtuar se Roma është rivali për të cilin di më së paku. “Roma është e vetmja skuadër nga ato që janë në gjysmëfinale me të cilën nuk jam ndeshur asnjëherë. Ata janë duke zhvilluar një sezon të mirë pas problemeve me transferimet e lojtarëve, ku humbën jo vetëm Salah, por edhe Emerson. Derisa të ndeshemi do të mësoj gjithçka rreth tyre. E kam parë sfidën ndaj Barcelonas, ishte mrekullisht e mirë”.