Kryetari i Bashkimit Demokratik, Zafir Berisha gjatë takimeve finale për përgatitjet e fushatës zgjedhore u takua me kandidatët për Kuvend Komunal të Prizrenit me të cilët bisedoi për strategjinë e fushatës si dhe për programin dhe platformën zgjedhore te Bashkimit Demokratik. Ai kërkoi nga kandidatët e BD-së për kuvend që vizionin e BD-së gjatë fushatës ta përcjellin tek çdo qytetarë i komunës së Prizrenit duke konsideruar se vizioni i BD-së është shpresa e vetme për një jetë më të mirë në qytetin e Prizrenit.
Gjithashtu, Berisha kërkoi nga strukturat e partisë angazhim maksimal për ti dhënë fund të keqes së madhe qeverisëse në Prizren si dhe u ndal me theks të veçantë tek situata e fundit politike dhe ekonomike në qytetin e Prizrenit.
“Para ekipit fitues të Bashkimit Demokratik shtrohet një detyrë e rëndësishme që me angazhimin tonë në bashkëpunim me qytetarët e Prizrenit ti japin fund korrupsionit dhe krimit të organizuar si dhe shkatërrimit urbanistik që po ndodhë në qytetin tonë dhe të hapim rrugë drejt zhvillimit të mirëfilltë ekonomik për zbutjen e papunësisë që ka kapluar shoqërinë tonë dhe për të cilën Bashkimi Demokratik ka projekte të qarta të cilët do ti prezantoj gjatë fushatës elektorale”, tha Berisha.
Strukturat e BD-së u zotuan se do të zhvillojnë një fushatë të qetë dhe demokratike si dhe do të jenë shembull edhe për subjekte tjera politike me modalitetin e fushatës që do ta bëjnë ku përmes kësaj fushate do të tregojnë një kulturë të veçantë që ka qyteti i Prizrenit./PrizrenPress.com/