Nderim Kabashi erdhi nga Zvicra për ta vizituar familjen e tij por u plagos rëndë.

Vozitja me shpejtësi e veturës dyshohet se ishte shkaktari i plagosjes së Nderim Kabashit nga i dyshuari Driton Badallaj, raporton KTV.

Të shtunën, në orët e vona të natës, pas një konflikti verbal, Driton Badallaj kishte shtënë dy herë me pistoletë në drejtim të tij, i cili ka të lënduar këmbën dhe po vazhdon të trajtohet në QKUK.

E, ndonëse vepra ishte cilësuar si vrasje e rëndë në tentativë dhe mbajtje në pronësi, kontroll dhe posedim të paautorizuar të armës, pas 48 orësh qëndrimi në mbajtje, prokuroria kishte kërkuar vetëm masën e arrestit shtëpiak për të dyshuarin Driton Badallaj.

Për më tepër, prokurori, sipas vendimit të gjykatës, fillimisht kishte kërkuar masën e paraburgimit, por më pas ai ishte tërhequr nga kjo kërkesë, duke e zbutur këtë masë në arrest shtëpiak.

Në vendimin e gjykatës gjithashtu thuhet se prokurorit i ishte përvjedhur një gabim teknik, ku thuhej se i pandehuri kishte qenë në arrati prej 1 korrikut të këtij viti, e që sipas prokurorit kjo është e pavërtetë.

Babai i të plagosurit, Neshat Kabashi, nuk po pajtohet me mënyrën se si është trajtuar rasti i djalit të tij nga ana e Prokurorisë.

Ai thotë se deri tash, askush nga policia dhe Prokuroria nuk ka marrë iniciativën për t’i intervistuar për rastin.

KTV-ja ka kontaktuar me prokurorin e rastit, Metush Biraj, por ai nuk ka pranuar të flasë para kamerës.

Biraj shkurt ka thënë se ai pas analizimit të rrethanave dhe provave e ka cilësuar të mjaftueshme masën e arrestit shtëpiak për të dyshuarin. Biraj më tutje ka shtuar se po vazhdon hetimet për këtë rast dhe se po mbledhin prova dhe dëshmi në terren.

KTV-ja ka qëndruar edhe në shtëpinë e të dyshuarit Driton Badallaj, por familja e tij nuk ka pranuar të flasë.