Prokuroria Themelore në Prizren ka ngritur 4 aktakuza për veprën penale prodhim dhe vënie në qarkullim të artikujve të dëmshëm ushqimorë.
Sipas njoftimit për media, pas përfundimit të hetimeve lidhur me dyshimet për prodhim dhe vënie në qarkullim të artikujve të dëmshëm ushqimorë, ka ngritur aktakuza kundër katër personave të dyshuar dhe kundër personave juridikë.
Katër aktakuzat janë për veprën penale “Prodhim dhe vënia në qarkullim e artikujve të dëmshëm ushqimorë” nga neni 267 i Kodit Penal së Kosovës.
“Të pandehurit, si persona përgjegjës në kuadër të personit juridik, me qëllim të shitjes kanë vënë në qarkullim artikuj ushqimor, përkatësisht mish dhe produkte të mishit, për të cilat kanë ditur se janë të dëmshme për shëndetin e njerëzve”, thuhet në njoftim të Prokurorisë Themelore në Prizren.
Po ashtu, Prokuroria Themelore në Prizren, kundër njërit prej të pandehurve ka ngritur aktakuzë edhe për veprën penale “Kanosje” nga neni 185 paragrafi 3 të Kodit Penal të Republikës së Kosovës.