Masa të shumta janë ndërmarrë për zbulimin e vrasësit të zyrtarit doganor të EULEX-it, lituanezit, Audrius Shenavicius. Përderisa Policia e Kosovës dhe EULEX-i, kanë marrë masa të tilla për këtë rast, zbulimi dhe kapja e vrasësve të policit të Kosovës, Enver Zymberi, vazhdon edhe më tej të zvarritet. Derisa autoritetet përgjegjëse për zbardhjen e këtij rasti, hezitojnë të flasin. Deputeti i Vetëvendosjes, Rexhep Selimi thotë se në Kosovë ka drejtësi selektive
Një numër telefoni është vënë në dispozicion për qytetarët që kanë ndonjë informacion për vrasësin e zyrtarit doganor të EULEX-it, Audrius Shenavicius. Policia e Kosovës dhe ajo e EULEX-it, kanë shpallë zyrtarisht apel për informacion lidhur me vrasjen e lituanezit, cili ishte vrarë gjatë rrugës për të shkuar në punë. Po ashtu është ndarë një shpërblim deri në 27 mijë e 500 euro për informatat të cilat do të çojnë tek arrestimi i autorit ose autorëve të vrasjes.
Por, e njëjta nuk ka ndodhur me zbulimin e autorëve të vrasjes së policit të Kosovës, Enver Zymberi. Janë bërë më shumë se dy vjet nga vrasja e tij, dhe nuk ka asgjë konkrete për zbulimin e vrasësve, përveç urdhërarrestit për gjashtë serbë nga Zubin Potoku, të cilët janë shpallur persona në kërkim.
Zëvendëskryetari i Komisionit parlamentar për punë të brendshme, Rexhep Selimi thotë se as drejtësia e EULEX-it, as drejtësia e Kosovës nuk e ka bërë as hapin më të vogël për zbulimin e këtij rasti. Sipas tij, në Kosovë ka drejtësi selektive.
“Sidomos në rastet me të cilat merret EULEX-i dhe deri diku edhe hetuesia e Kosovës janë një dimension i kësaj drejtësisë selektive. Jetët njerëzve, jetët e policëve, do duhej që të përjetoheshin njëjtë dhe qasja për zbulimin e tyre të ishte e njëjtë. Ne nuk themi pse po kërkohen vrasësit e doganierit lituanez, por themi pse nuk po kërkohen edhe vrasësit e Enver Zymberit dhe familjes Haradinaj në pjesën veriore të Mitrovicës”, tha Selimi për Radio Kosovën.
Ministri i Punëve të Brendshme, Bajram Rexhepi, i cili në shumë deklarata më herët ka thënë se shumë shpejt vrasësit e Enver Zymberit do të dalin para drejtësisë, tani nuk ka dashur të flas për këtë çështje. Të vetmen përgjigje që ka dhënë ka qenë kjo:
“Lajmëroni në zyrën për informim, pastaj shohim”, tha ai, i kontaktuar nga Radio Kosova.
Në Zyrën për informim e Ministrisë së Punëve të Brendshme, thanë se me këtë çështje merret Prokuroria e Shtetit, ndërsa zyrtarë nga kjo e fundit theksuan se kjo është çështje e EULEX-it. Ndonëse premtuan, zyrtarët e EULEX-it, nuk dhanë ndonjë përgjigje lidhur me këtë.
Deputeti i Vetëvendosjes Rexhep Selimi thotë zbulimi i vrasësve të Enver Zymberit mund të bëhet shumë lehtë, pasi që sipas tij, pista e parë ku do duhej të kërkoheshin këta vrasës është lista e policëve të MUP-it serb e cila është bërë gati t’i dorëzohet Policisë së Kosovës për t’u integruar. Ai shprehet i habitur pse Ministria e Punëve të Brendshme nuk po bën shtytje për zbulimin e vrasësve të Enver Zymberit, ndërsa kritikoi edhe EULEX-in lidhur me këtë rast.
“Ose bëhet fjalë për pazotësinë e tyre, ose bëhet fjalë për një farë përgjegjësie në mes, për shkak se vrasës nuk janë Ministria e Punëve të Brendshme, por përgjegjës të drejtpërdrejtë janë për shkak se e kanë rrezikuar jetën e policëve të vetë duke mos pasur asnjë plan operacional. Në anën tjetër edhe misionit të EULEX-it, nuk do duhej t’i dhembte vetëm kur i prek ata, por do duhej t’i dhembte kur preket çdo qytetar i Kosovës, çdo polic i Kosovës”, tha Selimi.
Enver Zymberi ishte pjesëtar i Njësisë Speciale të Policisë së Kosovës. Ai u vra gjatë aksionit të 25 korrikut të vitit 2011, në përpjekje për shtrirjen e autoritetit të shtetit në pjesën veriore të Kosovës. Enver Zymberi është shpallur Hero i Kosovës nga presidentja e vendit.