Partia Koservatore e Kosovës ka hapur fushatën zgjedhore në Prizren. Kryetari i PK-së, Munir Basha tha se ky subjekt politik, do të sjellë ndryshime në Prizren.
“Prezenca juaj dëshmon edhe njëherë përkushtimin tonë dhe arsyetimin se Partia Konservatore e Kosovës është një lëvizje e duhur, kuptimplotë dhe një nevojë e domosdoshme që do të sjellë ndryshime pozitive në Prizren, një parti që do të mbush zbrazësinë politike me frymë konservatore që i mbron vlerat dhe promovon përparim dhe zhvillim me dinjitet. Vizioni politik i Partisë Konservatore të Kosovës nuk është përjashtues, por përqafues, jo përçarës por bashkues që në epiqendër vendos qytetarin si sovranin kryesor të vendit”, tha Basha.
Partia Konsrevatore e Kosovës, fushatën zgjedhore e ka filluar pranë rrapit të vjetër në Marsh. Ky rrap tregon vjetërsinë, fortësinë, krenarinë dhe mbijetesën nëpër vështirësitë kohore.Në hapjen e fushatës zgjedhore të PK-së, kanë marrë pjesë mbi 500 qytetarë dhe simpatizantë të këtij subjekti politik.
Kandidati i PK-së për kryetar të komunës së Prizrenit, Beni Kizolli, ka shpalosur programin dhe ofertën e tij qeverisëse të mbështetur nga Kabineti për Qeverisje të Mirë.
“Tani kur ju shoh juve këtu, prezencën dhe mbështetjen tuaj, jam shumë i bindur se do të korrim sukses, jo vetëm se Unë dhe Kabineti im do të punojmë për të nxjerrë Prizrenit nga kaosi i qeverisjes së keqe, jo vetëm se ne kemi vizion për një ardhmëri të ndritshme, por edhe pse Ju qytetar të nderuar, ithtarët e Partisë Konservatore të Kosovës jeni gati që me votën tuaj të bëni ndryshime, jeni të përkushtuar që njëherë e përgjithmonë të thoni jo papunësisë, të thoni Jo skamjes dhe varfërisë, të thoni jo borxhit, të thoni jo pasurimit të pushtetarëve nën kurrizin tuaj. Do të korrim sukses sepse të gjithë së bashku kemi vizion, kemi projekte konkrete zhvillimore, kemi mbështetje të fuqishme nga partnerët tanë dhe kemi ide se si qeveriset një vend duke zëvendësuar politikën e vjetër të skaduar moralisht me një politikë të re që i takon të së ardhmes”, tha Kizolli.
Në fund janë prezantuar edhe kandidatët e Partisë Konservatore të Kosovës për anëtarët e Kuvendit të Prizrenit që garojnë në zgjedhjet e 3 nëntorit, të përcjellur me një duartrokitje frenetike./PrizrenPress.com/