Kryetari i Lidhjes Demokratike të Kosovës (LDK), Isa Mustafa, tha të shtunën në tubimin e parazgjedhor në Therandë (Suharekë) se nga fushata e deritanishme po e sheh qartë rikthimin e fuqisë që e ka pasur LDK-ja në kohën e Ibrahim Rugovës. Ai theksoi se fitorja e kësaj partie në zgjedhjet e ardhshme është e sigurt edhe në Therandë, në Prizren, në Rahovec dhe në Malishevë.
“Kjo LDK, të cilën po e shoh sot këtu është LDK-ja e Ibrahim Rugovës, janë qytetarët e përkushtuar ndaj veprës së Ibrahim Rugovës, të cilët e nderojnë punën e Ukë Bytyçit, prandaj, në këtë atmosferë, me këtë vullnet tuajin për LDK-në, ju ftoj që më 3 nëntor të vendosim në interes të Kosovës, që edhe në këtë komunë të qeverisë LDK-ja”, tha Mustafa.
Sipas tij, është e rëndësishme që LDK të shënojë fitore të ndjeshme në Therandë, në Prizren, në Rahovec e në Malishevë, që të zhvillohet bashkëpunimi ekonomik me Shqipërinë dhe të përshpejtohet integrimi shqiptar.
Mustafa, i cilësoi si punëtorë të mëdhenj qytetarët e Therandës, duke theksuar se e tërë Kosova krenohet me punën dhe sukseset e tyre, si brenda, ashtu edhe jashtë vendit.
“Këtu ne e ndjejmë zhvillimin, sepse ju keni qenë të zotët që ta zhvilloni vendin. Ne mburremi me punën tuaj dhe të atyre që jetojnë jashtë Kosovës. Njerëzit që jetojnë nga puna e tyre, që e ndërtojnë Therandën, janë njerëzit me të cilët krenohemi. Janë të pakorruptueshëm, sepse jetojnë nga puna e tyre dhe ky qytetërim është filozofia politike e LDK dhe ju e keni vendin në LDK”, u tha kryetari Mustafa qytetarëve të Therandës. Sipas tij, vota për LDK-në në Therandë dhe në tërë Kosovën është besim në perspektivën zhvillimore të vendit, qeverisjen e përgjegjshme dhe transparente.
“Fitorja jonë në këto zgjedhje na e siguron edhe fitoren në zgjedhjet e ardhshme nacionale dhe mundësinë për ta qeverisur Kosovën, ashtu siç e meritojnë qytetarët e Kosovës”, theksoi Mustafa.
Kandidati i për kryetar të LDK-së në Therandë (Suharekë), Sali Asllanaj, ndërkaq, u shpreh i bindur se LDK-ja do të jetë sërish bastion i kësaj partie dhe ndjekëse e filozofisë politike të Presidentit Ibrahim Rugova për qeverisje në funksion të interesave të qytetarëve.
“Përparësitë e programit tonë qeverisës qëndrojnë në zhvillimin e një administrate efikase dhe profesionale, në avancimin e politikave biznesore, qasjen kreative ndaj të rinjve, shërbimet efikase shëndetësore, arsimin cilësor dhe përmbajtjesor, stimulimin dhe subvencionimin e bujëqsisë, si dhe në prosperimin e kulturës e të sportit, duke mos lënë anash as infrastrukturën dhe mbrojtjen e ambientit”, tha Asllanaj. Ai tha se do ta respektojë në tërësi filozofinë politike të LDK-së që biznesin ta stimulojë përmes politikave fiskale, duke i shkelur, sikur tha ai, “manitë qeverisëse të haraqit e të tenderëve politikë që e ngulfasin zhvillimin tonë ekonomik”.
“Çdo i ri nën moshën 30-vjeçare që hap një biznes do të lirohet për dy vjet nga çfarëdo takse komunale, si lehtësim për mëkëmbjen e biznesit të tij”, tha Asllanaj. Ai u premtoi qytetarëve të komunës së Therandës se kriteri i punësimit përmes politikës do të zëvendësohet me kriterin e aftësive profesionale e pedagogjike në sistemin tonë arsimor.
Asllanaj tha se në mandatin e tij qeverisës, fermerëve do t’u ofrojë lehtësira në zhvillimin e veprimtarive të tyre përmes stimulimit dhe subvencionimit me 2 milionë euro.
“Lidhja Demokratike e Kosovës dhe unë me bashkëpunëtorët e mi, do t’ju oforjmë gjatë mandatit të ardhshëm, një qeverisje që nuk bazohet në krim e në haraq, në tenderë politikë e korruptivë, por në zhvillim cilësor në funksion të përmirësimit të jetës së qytarëve”, tha Asllanaj.
Në tubimin parazgjedhor të LDK-së në Therandë u prezantuan edhe kandidatët për këshilltarë komunalë, të cilët janë të profileve të ndryshme, të përgjegjshëm dhe të përkushtuar për t’u shërber qytetarëve. /PrizrenPress.com/