Vdekja e tij nuk e ka privuar nga epitetet që i fitoi falë krijimtarisë së gjatë letrare. Ai vazhdon të konsiderohet si klasiku i letërsisë shqipe për fëmijë, me vjershat e romanet e të cilit u rritën breza të tërë filloristësh. Në opusin e tij ndihet përherë një botë e pasur fëmijërore me elemente të pasura nga nënqielli shqiptar.
Shkrimtarë, kolegë e dashamirë të fjalës kanë përkujtuar të enjten shkrimtarin Rexhep Hoxha, i cili u nda nga jeta më 11 korrik të këtij viti disa muaj para se t’i mbushte 90 vjet.
E organizuar nga Lidhja e Shkrimtarëve të Kosovës në mjediset e Institutit Albanologjik, akademia përkujtimore solli vlerësime e diskutime për veprën e shkrimtarit që konsiderohet si themelues i letërsisë për fëmijë në Kosovë.
Pas një minutë heshtjeje, ku të pranishmit e nderuan shkrimtarin e ndjerë, kryetari i LSHK-së, Shyqri Galica, ka thënë se me veprën e Rexhep Hoxhës u edukuan breza të tërë në vend.
“Vepra e parë e profesor Rexhep Hoxhës do të jetë vazhdimisht një abetare për shkollarin e fillores, kurse do të jetë dhe një mesazh për jetën e tij, një mesazh edukativo-artistik që do ta ngrejë nivelin e tij arsimor dhe intelektual”, ka thënë Galica.
“Veprat e këtij shkrimtari do të lexohen jo vetëm nga fëmijët, por edhe nga struktura të ndryshme, sepse janë vlera artistike”.
Ai ka theksuar se poetika e Hoxhës është e veçantë nga përmbajtja, stili, idetë dhe pikëpamjet.
Në vazhdim janë deklamuar poezitë e Rexhep Hoxhës.