Kandidati i VV-së për kryetar të Komunës së Prizrenit, Arbër Rexhaj së bashku ma kandidatët për Kuvendin Komunal vizituan banorët e fshatit Malësi të Vrrinit. Në këtë takim kandidati, Rexhaj kërkoi që të mos votohen subjektet e vjetra politike. “Ky vend ka nevojë për ndryshim. Kurse, këtë ndryshim nuk mund ta bëjnë subjektet politike që kanë hise në këtë gjendje të padrejtë. Kërkojmë nga ju që ta votoni Lëvizjen Vetëvendosje! dhe kandidatët e saj, sepse vetëm ne jemi ndryshimi”
Rexhaj tha se përmes subvencionimit të bujqësisë, do të bëhet ulja e nivelit të lartë të papunësisë në këtë fshat. “Bujqësia është sektori i cili si në kuptimin cilësorë, ashtu edhe atë sasiorë, mund të krijojë shpejt dhe shumë vende të reja të punës. Investimet kapitale prej 360.000 euro në sektorin bujqësor, pra 1% të buxhetit, aq sa bën pushteti aktual, janë qesharake në raport me nevojat dhe mundësitë që posedon ky sektor. Me Lëvizjen Vetëvendosje do të bëhet subvencionimi i naftës, farës, hardhive, makinave bujqësore, grumbullimin dhe finalizimin e produkteve bujqësore dhe blegtorale, varësisht nga nevojat e fermerëve. Gjithashtu do të angazhohemi që ta bëjmë konceptualizimin e projekteve për prodhim dhe angazhimin e Komunës për ndërmjetësim rreth bashkimit të kapitalit privat, duke shtuar në këtë mënyrë shumën e investimeve të përgjithshme në bujqësi”, theksoi Rexhaj./PrizrenPress.com/