Kandidati i VV-së për kryetar të Komunës së Prizrenit, Arbër Rexhaj është takuar me qytetarët e lagjes ‘Arbanë’.
Ai tha se mjafton vetëm një menaxhim i mirë i burimeve të panumërta të Prizrenit për t’i kthyer gjallërinë dhe pasurinë qytetit, pa nevojën e shumave marramendëse që premtojnë partitë e tjera, të cilat sipas tij, futen në rangun e gënjeshtrave.
“Nëpërmjet rimëkëmbjes së bujqësisë dhe blegtorisë, do të rritet mirëqenia e qytetarëve dhe prodhimi i punëtorëve. Nëpërmjet rimëkëmbjes së turizmit, do të rinohen objektet e trashëgimisë kulturore të cilat kanë nevojë t’u rikthehet dinjiteti i tyre historik. Nëpërmjet këtyre ndërhyrjeve, rimëkëmbet ekonomia e qytetit historik të Prizrenit”.
Në këtë takim ka marrë pjesë edhe deputeti i Parlamentit të Kosovës, Florin Krasniqi.
Ai iu bëri thirrje qytetarëve që t’i lexojnë programet politike të partive pjesëmarrëse në zgjedhjet lokale, në mënyrë që zgjedhja e tyre t’u përshtatet nevojave.
“Vetëm në këtë mënyrë, Lëvizja Vetëvendosje! beson se qytetarët do të mund të vënë re se në subjektet e tjera politike, veç emrave, nuk ndryshon asgjë”, tha Krasniqi.
“Kudo në Evropë dhe në botë, një i akuzuar nga gjykata jep dorëheqjen nga pozicioni i vet, ndryshe nga pushteti aktual politik në Kosovë, që nuk do t’ja dijë për Prokurorinë”
Krasniqi gjithashtu dënoi dukurinë e blerjes së votave, duke i quajtur këto ‘vjedhje industriale’ të cilat e bëjnë qytetarin vazhdimisht të varur dhe nuk i japin as të drejtën e lirinë që të ankohet më pas. “Blerja e votës, në konceptin e Lëvizjes Vetëvendosje! do të thotë shitje e vetes dhe e lirisë individuale për të zgjedhur, si dhe shkarkon pushtetin aktual politik nga përgjegjësia dhe llogaridhënia ndaj qytetarëve./PrizrenPress.com/