Ministri i Mbrojtjes të Republikës së Kosovës, Anton Quni ka pasur një bisedë telefonike me ministren e Mbrojtjes së Republikës së Maqedonisë së Veriut, Radmila Shekerinska, ndërsa kanë biseduar për situatën e krijuar në dy shtetet pas përhapjes së pandemisë të COVID-19.
Në njoftimin për media po ashtu thuhet se është biseduar për gjendjen e gatishmërisë dhe aktivitetet e ushtrive përkatëse si dhe masat e marra për të përballuar këtë situatë të jashtëzakonshme, të krijuar jo vetëm në nivel regjional, por edhe ndërkombëtar.
Ministri Anton Quni ka falënderuar ministren Shekerinska për gatishmërinë e treguar në këto ditë të vështira.
Ai e ka njoftuar homologen e vet me situatë aktuale në Kosovë, me masat që janë marrë nga Qeveria e vendit në përballimin dhe menaxhimin e kësaj situate të jashtëzakonshme.
Quni e ka njoftuar edhe me shkallën e gatishmërisë dhe aktivitetet konkrete që po ndërmerr FSK-ja për përballimin e kësaj situate, si brenda strukturës së vet dhe kontributin që po jep në nivel shtetëror.
Ai po ashtu ministres Shekerinska i ka shprehur gatishmërinë e FSK-së, për të ndihmuar në rast nevoje në Republikën e Maqedonisë së Veriut me kapacitetet e specializuara që ka në gatishmëri FSK.
Në njoftim thuhet se edhe ministrja Shekerinska ka shprehur gatishmërinë e Maqedonisë së Veriut, ushtrisë së saj, përkatësisht ka vënë në dispozicion shërbimet e njësisë Atomike, Kimike dhe Biologjike, për të ndihmuar në rast nevoje përballimin e gjendjes emergjente në Kosovë. /Telegrafi/