Komuna e Malishevës, vazhdon të mbajë një situatë të qetë, sa i përket situatës me pandeminë COVID-19, pasi nuk ka raste të reja të regjistruara pozitiv me COVID-19, ndërsa të gjitha mostrat e testuara në ditët e fundit, kanë rezultuar negative , duke e ruajtur një gjendje të qetë dhe stabile sa i përket pandemisë.
Heqja e kufizimeve të lëvizjes dhe masave tjera, ka rritur lëvizjen e qytetarëve të cilët detyrimisht duhet ti kryejnë obligimet e tyre të përditshme, por deri më tani qytetarët në përgjithësi kanë treguar kujdes në raport me situatën me virusin korona dhe kjo ka ndikuar që gjendja të jetë e qetë.
Për këtë, edhe sot, në emër të shtabit emergjent komunal, që merret me menaxhimin e pandemisë COVID-19, nënkryetari i Komunës së Malishevës, Hajdin Berisha, ju ka bërë thirrje qytetarëve që të zbatojnë masat e kujdesit të shtuar, duke përdorur mjetet mbrojtëse, duke mbajtur distancën dhe duke ju shmangur grumbullimeve të rastit.
Gjendja me COVID-19 në Komunën e Malishevës, është kjo: 77 të prekur me COVID-19, prej tyre 75 janë shëruar plotësisht, një rast vazhdon të mbetet aktiv dhe një person ka rezultuar me vdekje.