Melsi Labi është emëruar drejtori i ri i Muzeut Historik Kombëtar. Me këtë post, Labi zëvendëson historianin e periudhës së Mesjetës, prof. Luan Malltezi, i cili qëndroi për disa vite në këtë detyrë. Përzgjedhja e Labit erdhi pas shpalljes së konkursit për pozicionin e drejtorit të Muzeut Historik Kombëtar. Konkursi u shpall në datën 21 tetor nga Ministria e Kulturës dhe afati i dorëzimit të dosjeve të kandidatëve ishte 31 tetori.
Dje në mbledhjen e qeverisë u bë emërimin në detyrë të drejtorit të Cirkut Kombëtar të z. Kujtim Dumi, por dhe emërimin në detyrë të drejtorit të Përgjithshëm të Qendrës Kombëtare të Kulturës për Fëmijë dhe Teatrin e Kukullave të znj. Monika Lubonja. Të tre këta emra të emëruar së fundmi në këto poste drejtuese, prej vitesh kanë qenë të angazhuar me artin dhe kulturën, por edhe në politikat për artin. Këto emërime vijnë në vijim të drejtuesve të tjerë që janë emëruar gjatë kësaj kohe në të tjera institucione.