Puna e komisionit për njohjen dhe verifikimin e statusit të veteranëve, invalidëve, pjesëtarëve dhe të internuarve të UÇK-së vazhdon të ngecë.
Ka më shumë se gjashtë muaj që ky komision nuk është mbledhur, derisa gjatë gjithë kësaj kohe munguan edhe arsyetimet se pse po ndodh një gjë e tillë, transmeton KTV.
Agim Çeku, i cili udhëheq me këtë komision që nga largimi i Azem Sylës, thotë se shkaku i ngecjes mbrapa në funksionimin dhe punën e këtij komisioni kanë qenë çështje teknike.
Çeku tregon se ka thirrur mbledhjen e këtij komisioni, që do të mbahet në fillim të muajit të ardhshëm.
Por, kryetari i OVL-së së UÇK-së thotë se këto nuk mund të jenë arsye, derisa hedh kritika të shumta në adresë të udhëheqësve.
Kritika për këtë hedh edhe shoqëria civile, sipas së cilës, kanë kaluar gjithë këto vite që nga përfundimi i luftës dhe ende ata njerëz që kontribuuan nuk po i marrin meritat që u takojnë.