Shtetasi i Republikës së Shqipërisë, Rini Tahiri, është dënuar nga Gjykata Themelore në Prizren me 1 vit burgim me kusht dhe 200 euro gjobë, pasi u shpall fajtor për dhënie të ryshfetit.
Sipas aktgjykimit të shpallur të mërkurën nga gjykatësja Raima Elezi, dënimi me burg ndaj Tahirit nuk do të ekzekutohet, nëse i njëjti nuk kryen vepër tjetër penale brenda dy vitesh, raporton “Betimi për Drejtësi”.
Ndaj tij u shqiptua edhe dënimi plotësues, dëbimi nga Republika e Kosovës për një periudhë prej 3 vitesh, pas plotfuqishmërisë së aktgjykimit.
I akuzuari gjithashtu u obligua që t’i paguajë 30 euro në emër të paushallit gjyqësor dhe 50 euro në emër të programit për kompensimin e viktimave të krimit.
Po ashtu, gjykata vendosi që të konfiskohet edhe monedha prej 50 euro, si mjet i kryerjes së veprës penale.
Ndryshe, sipas aktakuzës së Prokurorisë Themelore në Prizren, Rini Tahiri akuzohet se me 19 dhjetor 2020, rreth orës 05:45 minuta, në pikën kufitare Shqipëri – Kosovë, në vendkalimin kufitar të Vërmicës, është vërtetuar se në mënyrë të drejtpërdrejtë i ofron personit zyrtar përfitim pasuror, në mënyrë që i njëjti të veproj ose të mos veproj në pajtim me detyrën e tij zyrtare.
Sipas aktit akuzues, kjo ndodhë në atë mënyrë që gjatë kalimit të pikës doganore, duke drejtuar automjetin e tipit “ Opel Zafira ”, pronë e babait të tij, Demir Tahirit, me të cilin ishte duke udhëtuar, në momentin kur zyrtarit policor Feriz Hoti ia ka dorëzuar dokumentet personale dhe dokumentet e automjetit, në dokumente të prezantuara i ka futur 50 euro dhe ka kërkuar nga zyrtari policor që t’i mundësohet Demir Tahirit hyrja në Kosovë, edhe për kundër faktit se i njëjti kishte ndalesë për të hyrë në këtë shtet.
Me këto veprime, Rini Tahiri akuzohet se ka kryer veprën penale “dhënia e ryshfetit”. /BetimipërDrejtësi
