“Dënojmë rreptësishtë vrasjen e komandant Drinit”, thuhet në letrën që Daut Haradinaj ia kishte dërguar familjes së Ekrem Rexhës, kur ky i fundit ishte vrarë në një atentat që – pas publikimit të Dosjeve të UNMIK-ut nga Albanian Post – mësohet se vinte nga armët e njëjta me të cilat më vonë u ekzekutua edhe ish-zyrtari i lartë i LDK-së, Xhemail Mustafa.
Albanian Post ka siguruar një telegram ngushëllimi që me nëntë maj të vitit 2000, vetëm një ditë pas vrasjes së Rexhës, Haradinaj, atëkohë Komandant i Zonës së Tretë Mbrojtëse, në cilësinë e Gjeneral Majorit, ia kishte dërguar familjes së të vrarit.
Në letër thuhet se “me keqardhje të thellë e morëm lajmin për vrasjen tragjike të ish luftëtarit të Ushtrisë Çlirimtare të Kosovës Ekrem Rexhës, ish komandat i Zonës Operative të Pashtrikut dhe tani drejtor i Drejtorisë së Ambientit dhe Sigurisë në Bordin Administrativ në Prizren”.
Rexha ishte vrarë me armë automatike pranë shtëpisë së tij në lagjen “Bazhdarhane” në orët e hershme të tetë majit kur kishte dalë nga shtëpia për ta ndezur veturën.
Dosjet e publikuara nga Albanian Post, e përpiluar nga UNMIK-u pas vrasjeve të Rexhës e Mustafës, zbardhë komunikimet brenda organeve të hetuesisë ku konstatohej se të dy këta ishin ekzekutuar nga armët e njëjta.
“Njësia Rajonale e Hetimeve në Prizren në bashkëpunim me Taskë-forcën Speciale, po ashtu kanë konstatuar se armët e përdorura në vrasjen e Xhemail Mustafës janë përdorur edhe në vrasjen e Ekrem Rexhës, të njohur me nofkën ‘Drini’ në Prizren”, shpalosë kjo dosje e UNMIK-ut.
Vrasja e Rexhës atëbotë, siç tregon edhe letra nga arkiva e TMK-së, dënohej ashpër.
Daut Haradinaj, në letrën shkruar si telegram ngushëllimi thoshte se “dënojmë rreptësishtë vrasjen e komandant Drinit dhe kërkojmë që sa më parë organet kompetente të Kosovës të zbulojnë aktorët e krimit dhe t’u jepet dënimi i merituar”.
Ai shprehte “ngushëllime tonat më të thella për humbjen tragjike të më të dashurit tuaj”.
Ky adresim i Haradinajt përfundon me “nderime të përmotshme”, shkruar me shkrim dore dhe me nënshkrim të Haradinajt e të vulosur me vulën e TMK-së.
