Mesfushori i Interit, Marcelo Brozovic ka hyrë në vitin e fundit të kontratës me Interin dhe reprezentuesi i Kroacisë raportohet se ka kërkuar rritje page për të qëndruar.
La Gazzetta dello Sport raporton se trajneri i ri i Interit, Simone Inzaghi dëshiron ta mbajë Brozovicin dhe klubi shpreson të arrijë një marrëveshje me 28-vjeçarin pas Kampionatit Evropian.
Ish-mesfushori i Dinamo Zagrebit po përgatitet për përballjen me Spanjën në të tetën e finales së Euro 2020 nesër, por e ardhmja e tij me zikaltrit është e pazgjidhur.
Kontrata e tij me Interin skadon në qershor të vitit 2022 dhe “Nerazzurët” mund ta shesin këtë verë dhe ta evitojnë largimin e tij falas në verën tjetër.
Mesfushori defanziv luajti 33 ndeshje në Serie A edicionin e fundit, duke i ndihmuar Interit në fitimin e titullit pas 11 viteve. Sipas raportit, Brozovic po k?rkonë gjashtë milionë euro në sezon për të vazhduar me të.
Brozovic momentalisht fiton 3.5 milionë euro dhe ka kërkuar rritje page pasi ka kuptuar se Calhanoglu do të fitojë 5 milionë në vit.
Negociatat janë shtyrë deri pas përfundimit të Kampionatit Evropian, por Interi mund të shes kroatin nëse nuk arrihet një marrëveshje. /Gazeta Express/