Përfaqësuesit e Degës së LDK-së në Prizren pajtohen se ky sybjekt politik ka nevojë për rishikim të brendshëm të pozicionit që ka aktualisht në këtë komunë dhe në rastëse është nevoja të aplikojë ndryshime në strukturat e saj drejtuese.
“Do të duhej që fillimisht të mblidhet kryesia e degës dhe të analizojë gjendjen aktuale dhe çfarë duhet të bëjmë tani e tutje”, ka thënë Haziz Hodaj, nënkryetar i Degës së LDK-së në Prizren.
Sipas tij, gjatë kësaj analize nuk duhet përjashtuar as oposioni i pensionimit të Kryesisë aktuale. “E para është të bisedojmë dhe pastaj të shohim se a duhet të shkojmë në pension apo të largohemi krejt nga kryesia”, tha Hodaj.
Edhe nënkryetari tjetër i LDK-së në Prizren, Hanifi Muharremi ka pranuar se kryesia e degës duhet të analizojë zhvillimet pas zgjedhjeve komunale.
“Kryesia e degës ende nuk është tubuar. Natyrisht se duhet ulur dhe shqyrtuar se cili ka qenë shkaktari i humbjes. A është shkaktuar kjo nga gara e pabarabartë, premtimet e joshjet e rivalit tonë politik apo ka qenë në pyetje organizimi ynë”, ka thënë Muharremi./KD/