Juventus-i e ka gjetur zëvendësuesin e Paulo Dybala-s. Sipas mediave italiane, Mohamed Salah pritet të jetë ylli i ri që do të luajë për ngjyrat bardhezi.
Ish-lojtari i Roma-s ka kontratë deri në verën e 2023 me Liverpool-in dhe negociatat për rinovimin e saj duken shumë larg. Në këtë situatë është Juventus-i që kërkon të përfitojë.
Teksa vetëm dy ditë më parë, “Zonja e Vjetër” zyrtarizoi se Dybala nuk do të rinovonte në “Allianz Stadium”, nuk kanë humbur kohë për të gjetur zëvendësuesin e tij.
Salah është preferenca e parë dhe profili ideal për Juventus-in. 29-vjeçari pëlqehet shumë nga bordi dhe trajneri Massimiliano Allegri.
Në fakt, ai është pëlqyer nga klubi bardhezi qëkurse luante në Serie A me Fiorentina-n e më pas me Roma-n.
Sipas “La Gazzetta dello Sport”, Juventus-i ka gati ofertën për të kënaqur Salah-un. Bardhezinjtë do t’i ofrojnë egjiptianit 10 milionë paund neto në sezon dhe një kontratë katërvjeçare.
Megjithatë, fillimisht Juventus-i duhet të bindë Liverpool-in.
Skuadra angleze pagoi 43 milionë euro në vitin 2017 për të marrë Salah-un nga Roma. Ndërsa, aktualisht ai vlen më shumë se dyfishi i asaj shume.
Salah, nga ana tjetër, thuhet se i ka kërkuar Liverpool-it rreth 400 mijë paund në javë për të rinovuar. Një kontratë e tillë do ta bënte atë lojtarin më të paguar në historinë e Liverpool-it.
Këtë sezon 29-vjeçari numëron 36 paraqitje, 28 gola dhe 10 asiste. Ndërsa, më herët, gjatë kohës që luante në Serie A, ai ka regjistruar 81 paraqitje, 35 gola dhe 22 asiste.
/Albanianpost.com