Hans Haekkerup, ish-ministri danez i Mbrojtjes, i cili në vitin 2001 ishte kreu i misionit të UNMIK’ut në Kosovë, ka vdekur pas një sëmundjeje të gjatë dhe është varrosur sot.
Haekkerup (68) ishte anëtar i Partisë Social Demokratike danez.
Anëtar i Parlamentit të Danimarkës u bë në vitin 1979. Në vitin 1993 mbajti postin e Ministrit të Mbrojtjes, ndërsa në vitin 2001 erdhi në Kosovë si pasardhës i Bernard Kouchner në postin e Përfaqësuesit Special të Kombeve të Bashkuara.
Opinioni shqiptar e mban në mend atë për të keq, pasi që ai nënshkroi një marrëveshje – e konsideruar e dëmshme për Kosovën – me përfaqësuesin e Qeverisë serbe, Nebojsha Qoviq.
Ndërsa, B92 shkruan se ai mbahet mend për mbartjen e zgjedhjeve të para në Kosovë, të cilat sipas tyre, ishin hapi i parë drejt shpalljes së pavarësisë që ndodhi në vitin 2008.