Shpenzimet prej dhjetëra milionash, të cilat i bën Ministria e Punëve të Jashtme për stafin e diplomatik të Kosovës nëpër botë, zëvendësministri i Punëve të Jashtme, Petrit Selimi, i ka cilësuar si harxhime modeste, duke thënë se në raport me diplomacitë e vendeve të rajonit, diplomacia jonë është minimaliste në shpenzime.
Për të gjitha misionet diplomatike të Kosovës, nga buxheti i vendit çdo vit ndahen nga 15 milionë euro.
Zëvendësministri i Punëve të Jashtme, Petrit Selimi, tha për Telegrafin se Ministria e Punëve të Jashtme shpenzon vetëm tetë milion euro për operacionet e rrjetit diplomatik dhe konsullor.
Sipas tij, buxheti prej 15 milionë euro, gjatë vitit, është i planifikuar jo vetëm për rrjetin diplomatik dhe konsullor, por edhe për shpenzimet tjera në mallra dhe shërbime, si dhe investimet kapitale të MPJ-së së Kosovës.
“Ambasadat dhe konsullatat kosovare operojnë me buxhet modest dhe pa lukse të tepërta dhe është vështirë të paramendohet ndonjë shkurtim i buxhetit pa pasur konsekuenca negative në operim te tyre. Me dhjetëra mijëra kosovarë shërbehen nga rrjeti konsullor, ndërsa edhe ambasadorët janë të rëndësishëm për mbrojtjen e interesave nacionale të Kosovës nëpër vendet ku shërbejnë. Stafi i Ambasadave është në përgjithësi i kualifikuar, ndërsa se fundmi kemi themeluar edhe Akademinë Diplomatike për trajnime të mëtutjeshme profesionale”, ka thënë Selimi për Telegrafin.