Prizreni që nga viti 2009 po e zhvillon kulturën e leximit nëpërmjet Javës së Leximit. E sivjet organizimi ka kaluar përtej pritshmërive.
Ndërkaq një pikë tjetër pozitive është përfshirja e komuniteteve.
“Interesimi këtë vit i fëmijëve ka qenë shumë i madh sesa viteve të tjera. Çdo vit kemi përfshirë nga 50 fëmijë nga të gjitha nacionalitetet që jetojnë në Prizren. Është një grupmoshë e fëmijëve nga mosha 10 deri 14, që çdo ditë realizojnë aktivitete të ndryshme”, ka thënë drejtoresha e bibliotekës së Prizrenit, Sadete Sadikaj në “Mirëmëngjesi Kosovë” të RTK-së.
Lekturat shkollore janë në interes të lexuesve të vegjël përherë, mirëpo tashmë kanë nisur edhe përpjekjet për shtrirjen e leximit në libra të tjerë.
“Qëllimi i këtij aktiviteti është promovimi i leximit në hapësira të hapura kryesisht me shkrimtarë të ndryshëm që kanë qenë të angazhuar këtë vit. Kemi pasur Ibrahim Skënderi, që është shkrimtar shumë i mirë për fëmijë, poashtu Teuta Muja, shkrimtare që çdo ditë e më tepër po realizon me sukses botimet e saja. Kanë qenë aktori Xhevdet Doda, mjek Mybera Mustafa, kanë qenë plotë të angazhuar nga Lidhja e Prizrenit”, ka përmendur ajo disa nga aktivitetet.
Reklamë
