Të hënën është përuruar objekti i ri i shkollës “ Zenun Çoçaj” në Gjonaj, përmes një ceremonie festive. Pjesë e kësaj ceremonie ishin nxënës, prindër dhe stafi i shkollës, si dhe kryetari i Prizrenit, Shaqir Totaj me bashkëpunëtorë.
Ai në një fjalim rasti, tha se është kënaqësi që në lokalitetin e tij të origjinës, po përurohet ky objekt i cili do të ofrojë kushte sa më të volitshme në ngritjen e cilësisë në arsim. Drejtoresha e Arsimit në Prizren, Luljeta Veselaj- Gutaj, tha se objekti është ndërtuar sipas standartëve më bashkëkohore, për të ofruar kushte optimale për proces të mirëfilltë edukativo-arsimor.
Drejtori i shkollës, Qazim Çoçaj, tha se ndërtimi i objektit të ri shkollor në Gjonaj, ka qenë kërkesë e prindërve, që nxënësit të cilët udhëtonin për në shkollën tjetër, të kenë më afër një objekt të tillë, ndërsa pati një kërkesë ndaj autoriteteve komunale për objekte tjera përcjellëse.
Aktivisti i fshatit dhe anëtari i Kuvendit të Prizrenit, Haziz Hodaj, ishte i lumtur që nga dita e sotme, nxënësit do të ndjekin mësimet në një objekt shumë më afër shtëpive të tyre dhe në kushte shumë të favorshme, për dallim nga objekti i vjetër i cili nuk i plotësonte kushtet elementare për punë cilësore.
Punimet në ndërtimin e këtij objekti të ri shkollor kanë filluar në vitin 2019. Kostoja e përgjithshme e projektit kap vlerën e 601 mijë eurove dhe do të ketë 9 dhoma mësimi, tre kabinete dhe hapësirë për bibliotekë. Në objektin e ri përveç atij ekzistues në Kodrën e Pajtimit, mësimet i ndjekin rreth 400 nxënës. Për të gjithë të pranishmit u shfaq edhe një program artistik nga nxënësit./tv prizreni