Drejtori i Drejtorisë së Shërbimeve Publike në Prizren, Çelë Lamaj, ka bërë të ditur se projekti për rehabilitimin e rrugës “Ibrahim Rugova” është në zhvillim.
Investimi ka filluar pasi shumë anekse të rrjetit të kanalizimit janë të vjetruara dhe një sasi e madhe e ujërave nëntokësore futen në këtë rrjet dhe shkojnë në impiant si ujëra jo të ndotura.
Projekti është një bashkëpunim midis Banka Gjermane për Zhvillim (KfW) dhe “Hidroregjionit Jugor”.
“Projekti në fjalë është projekt i KfW (qeveria gjermane) në bashkëpunim me “Hidroregjionin Jugor”, e cila bënë investime për rehabilitimin e sistemit të kanalizimit në komunën e Prizrenit në vlerë prej 4.5 milion euro”, tregon Lamaj.
“Projekti i rehabilitimit të rrugës është bërë në vitin 2022, kurse projekti i KFË në vitin 2023 nga i cili projekt rezulton se shumë akse të rrjetit të kanalizimit janë të vjetruara dhe një sasi e madhe e ujërave nëntokësore futen në këtë rrjet dhe shkojnë në impiant si ujëra jo të ndotura.“
Drejtori i Drejtorisë së Shërbimeve Publike, Çelë Lamaj tha se mbasi të përfundojnë punimet, asfalti dhe trotuari do të kthehen siç ishin.
“Për këtë arsye ata investimin e kanë bë në impiant për trajtimin e ujërave fekale e jo ujërave atmosferike – pra ata me projektin e vetë rreth këtij rehabilitimi tentojnë që ujërat fekale të shkojnë në impiant si ujëra të ndotura. Në kontratën e tyre mbasi të përfundojnë punimet duhet që ta kthejnë gjendjen e mëparshme të kësaj infrastrukture- asfaltin dhe trotuarin.“, deklaroi Lamaj për Insajderin.
Ndërkaq, partitë opozitare(LDK-LVV) kanë akuzuar pushtetin për keqplanifikim dhe keqpërdorim të taksave të qytetarëve në këtë rrugë. Sipas këtyre subjekteve politike në këtë rrugë është investuar disa herë brenda një kohe të shkurtër.
