Në një ndeshje të tensionuar, me ndërprerje, hedhje të gjësendeve nga shikuesit e përplasje ndërmjet lojtarëve, Trepça ka siguruar finalen e Kupës së Kosovës në basketboll.
Mitrovicasit, para publikut vendës shënuan fitore në ndeshjen e dytë gjysmëfinale me rezultat 84:66 duke përmbys bindshëm rezultatin e ndeshjes së parë që e kishin fituar bardhekaltrit me dy pikë avantazh.
Pjesa e parë foli për një nuancë në favor të Trepçës që e mbylli në epërsi prej 7 pikëve, 43:37.
Por vendimtare ishte periudha e tretë kur vendësit patën një seri fantastike, për të kaluar në plus 17 pikë epërsi, 69:52.
Mikaile Tmushiq ishte inspirues në këtë fitore të madhe të Trepçës, me 23 pikë, prej tyre pesë treshe.
Trepça në finale e pret fituesin nga dueli Bashkimi – Vëllaznimi, që luhet të enjten në Prizren.
