Festa për nder të Ditës së Pavarësisë së Kosovës në Prizren është përmbyllur me koncertin e këngëve dhe valleve tradicionale.
Programi në fjalë është përgatitur nga ShKA “Agimi” dhe AKKV “Shota”, derisa publiku nuk ka lënë vende të zbrazëta në sallën e Shtëpisë së Kulturës “Xhemajli Berisha”, raporton Telegrafi.
Në njoftimin e Komunës së Prizrenit thuhet se një koncert fantastik me këngë e valle është realizuar në Shtëpinë e Kulturës “Xhemajli Berisha” për kremtën e ditës historike, Ditës së Pavarësisë së Kosovës.
“SHKA “Agimi”, në bashkëpunim me Ansamblin Kombëtar të Këngëve dhe Valleve “Shota” sollën një atmosferë tipike festive në Prizren, me këngë korale, muzikë e valle tradicionale, për ta përmbyllur këtë ditë në mënyrën më të këndshme të mundshme”, thuhet në njoftim.
Koncerti është duartrokitur nga publiku i pranishëm, i cili ka shijuar performancat energjike dhe emocionale të ShKA “Agimi” dhe AKKV “Shota”. /Telegrafi/
