Shoqëria Kulturore-Artistike “Malësori” nga fshati Gjonaj i Hasit ka mbushur plot 50 vite veprimtari , një rrugëtim i gjatë që mishëron kulturën, artin dhe trashëgiminë shpirtërore shqiptare.
“50 vite kulturë, 50 vite art, 50 vite trashëgimi shpirtërore, 50 vite përfaqësim dinjitoz i kulturës dhe traditës së lashtë shqiptare nga krenaria hasjane,” është përshkrimi që i bëhet kësaj shoqërie që ka lënë gjurmë të pashlyeshme në skenën kulturore të vendit, njofton Klankosova.tv.
Për këtë ka folur edhe kryetari i shoqërisë, Haziz Hoda, në emisionin “Ora 7” në Klan Kosova, i cili tha se kjo është një histori e pastër, me sfida dhe shkëlqime të saj.
“Është një histori e pastër, me shkëlqimet dhe rëniet e saj, mjaft sfiduese sidomos në kohën e paraluftës, por me angazhimin e pjesëtarëve dhe vullnetarëve të devotshëm, ja kemi dalë të mbijetojmë. Megjithatë, pas luftës ka qenë koha e shkëlqimit të saj në të gjitha nivelet”, u shpreh Hoda.
