Kryetari i Komunës së Mamushës, Abdylhadi Krasniç, ka njoftuar se ka nënshkruar marrëveshjeje mirëbesimi me zëvendësministrin e MMPHI-së, Hysen Durmishi për një projekt kapital në vlerë prej 400,000 euro.
Sipas tij, marrëveshja në fjalë ka për qëllim realizimin e projektit për përmirësimin e infrastrukturës rrugore në këtë komunë.
“Projekti i titulluar “Asfaltimi i rrugëve ‘Pasha’, ‘Kulturë’ dhe ‘Demirci’” do të zbatohet brenda territorit të Mamushës”, ka bërë të ditur Krasniç.
Ai ka shtuar se në kuadër të projektit do të asfaltohet rruga e lagjes ‘Pasha’ deri te kryqëzimi pranë shkollës Anadolu, duke filluar nga rruga kryesore dhe duke zbritur drejt shkollës. Gjithashtu, ka bërë të ditur se në projekt përfshihet edhe asfaltimi i rrugës së “Kulturës” dhe rrugës “Demirci” që kalon pas Stacionit të Policisë.
“Synimi ynë është që ta përfundojmë këtë projekt në kohë sa më të shpejtë dhe t’u sjellim qytetarëve tanë një investim të qëndrueshëm në infrastrukturë”, ka thënë Krasniç, duke shtuar se procedura e tenderimit do të hapet shumë shpejt.
Në të njëjtën kohë është zotuar se komuna do të vazhdojë aktivitetet që kanë për qëllim përmirësimin e kushteve të jetesës për banorët dhe zhvillimin e mëtejshëm të Mamushës. /Telegrafi/