Punimet për finalizimin e ndërtesës së re të Bibliotekës së Qytetit, afër ish-shkollës së Ryzhdije në Prizren kanë filluar të hënën.
Autoritetet komunale kanë theksuar se projekti në fjalë në të shkuarën është përballur me ngecje e pengesa, dhe kanë uruar që i njëjti të realizohet brenda një afati optimal kohor, në mënyrë që kjo hapësirë e re të shfrytëzohet nga lexuesit dhe komuniteti kulturor.
Kryetari Shaqir Totaj ka bërë të ditur se jetësimi i këtij projekti ka qenë njëra prej pikave më të rëndësishme të paraqitura në fushatën parazgjedhore.
“Por përtej asaj është nevojë e qytetit të Prizrenit, për shkak se përkundër zhvillimit të teknologjisë libri është burimi kryesor i dijes. Ka pasur ngecje, ka pasur pengesa, edhe derisa i kemi eliminuar ato, na është vonuar paksa projekti. Por sot jemi këtu, po përurojmë rifillimin e punimeve dhe jam i sigurt që brenda një afati kohor optimal, operatori ekonomik do ta rregulloj, dhe do të krijohet një ambient i këndshëm për gjithë lexuesit por edhe për ngjarje kulturore”, ka thënë Totaj, raporton Telegrafi.
Ndërkaq drejtoresha e Bibliotekës së qytetit, Sahadete Sadikaj-Kukaj ka pohuar se Prizreni meriton të ketë një Bibliotekë me hapësira adekuate.
“Biblioteka është shumë e rëndësishme për një qytet, kështu që është shumë e mirëseardhur nëse shohim që diçka po ecën me hapat tutje për zhvillimin e Bibliotekës së Prizrenit. Prizreni meriton të ketë një bibliotekë adekuate dhe është më shumë se e nevojshme, pse jo”, ka deklaruar ajo.
Ndërsa drejtori i Kulturës, Adem Morina ka sqaruar se projekti është tre vjeçar dhe se vlera e kontraktuar është mbi 1.4 milionë euro.
“Sa i përket implementimit të projektit është deri në prill të vitit 2027 që të përfundojnë të gjitha punimet. Ne urojmë që ndoshta të përfundojnë edhe më herët. Kurse sa i përket kostos, është një vlerë goxha e madhe prej 1.4 milionë euro dhe urojmë të jetë përfundimtare për funksionalizimin e Bibliotekës së qytetit”, është shprehur Morina, raporton Telegrafi.
Ndërtesa e re e Bibliotekës në Prizren në lagjen “Tabakhane” ka filluar të ndërtohet para afër një dekade. Mirëpo pas realizimit të punimeve të vrazhda, nuk ka pasur intervenime tjera. /Telegrafi/
