Përveç në bordet e universiteteve publike, dy nga këshilltarët politikë të ministrit Buja janë anëtarë bordi edhe në institucione të tjera
Në MASHT kanë zgjedhur të heshtin për këtë, ndërsa për ekspertët e arsimit ky është okupim, politizim, e kontroll partiak i institucioneve të pavarura – shkruan Koha Ditore.
Këshilltarët e ministrit Ramë Buja, përveç në Ministri, janë angazhuar edhe nëpër detyra të tjera me funksion publik, kryesisht nëpër bordet e universiteteve publike të qyteteve jashtë Prishtinës, por edhe në institucione të tjera arsimore.
Burime të gazetës brenda MASHT-it bëjnë të ditur se Drita Kadriu është anëtare e Bordit Drejtues të Universitetit të Mitrovicës, Selvie Halimi në atë të Prizrenit, Arbër Morina në atë të Gjilanit, kurse Naser Mrasori është emëruar rektor në Universitetin publik të Pejës. Ai ka qenë këshilltar politik i ministrit Buja deri në kohën e emërimit rektor i UP të Pejës.
E pos në bordet drejtuese në universitetet publike, dy nga këshilltarët, përkatësisht Ragip Gjoshi dhe Elmi Ramadani, janë anëtarë edhe në Bordin e Qendrës së Studentëve. Për më tepër Gjoshi deri tani ka qenë anëtar edhe në Bordin e Këshillit Kombëtar të Kualifikimeve.