Kryetari i nderit i Lidhjes Demokratike të Kosovës, Fatmir Sejdiu, në një prononcim për Telegrafin tha se shpesh herë është keqpërdorur emri i familjes së ish – presidentit të Kosovës, Ibrahim Rugova.
Sejdiu thotë se “kjo familje emblematike meriton respekt dhe që unë çdoherë jam munduar ta nderoj dhe t’ia jap vendin që i takon”.
Ndërsa, sa i përket Ukë Rugovës, djalit të ish presidentit Rugova, Sejdiu ka theksuar se, “dëshiron të besojë në pafajësinë e tij”, duke shtuar se “ligji është mbi të gjithë, pavarësisht kushdo që është në bankën e të akuzuarve”.
“Shumë njerëz, duke e fshehur prapa emrit të familjes Rugova, sot gëzojnë pozita të rëndësishme, madje për këtë kanë ndikuar një sërë faktorësh. Formimi i ‘Listës Dr. Ibrahim Rugova’ është histori në vete në gjithë këtë tregim”, ka thënë Sejdiu për Telegrafin.
Ndryshe, njëri prej themeluesve të “Listës Dr. Ibrahim Rugova”, Dardan Gashi, ka thënë se heshtja e LDK-së ndaj arrestimit të Ukë Rugovës, tregon se kjo parti e ka harruar familjen Rugova. Mirëpo, i menjëhershëm ka qenë reagimi i partisë së Mustafës, e cila e ka quajtur Ministrin e Ambientit, shërbëtor të PDK-së dhe Hashim Thaçit.