Familjarët e 27 viktimave të luftës nga Suhareka, të hënën kanë pranuar mbetjet mortore, të identifikuara në Departamentin e Mjekësisë Ligjore në Prishtinë, shkruan sot Koha Ditore. Ndërkohë që eshtrat e 19 viktimave nga Krusha e Vogël do të dorëzohen të martën (sot).
Të gjeturit do të varrosen më 26 mars, në 15-vjetorin e vrasjes. Familjarët kanë kërkuar nga Qeveria që të bëjë presion mbi Serbinë dhe të kërkojë që Qeveria e saj të tregojë ku janë edhe rreth 1700 persona të zhdukur në luftën e vitit 1998-1999.
Dashurie Berisha-Kuqi ka thënë se dhimbjen e ka më të lehtë pasi të hënën ka pranuar eshtrat e shtatë familjarëve të zhdukur. Ajo ka nënshkruar letrat e pranim-dorëzimit të mbetjeve mortore të nënës, babait, motrës, vëllait, dy djemve të vëllait dhe nuses së vëllait. “Ndihemi më të çliruar”, ka thënë ajo.