Anna Kim
Koha e ngrirë
Përktheu: Afrim Koçi
Botimet: “Pegi”
Çmimi: 500 lekë
libratQë nga mbarimi i luftës në ish-Jugosllavi, Komiteti Ndërkombëtar i Kryqit të Kuq ka njoftuar për më tepër se 30 000 njerëz të humbur. Sipas të dhënave zyrtare më të fundit, janë identifikuar afërsisht 15000 persona. Ky është sfondi i ngjarjes që Anna Kim na rrëfen në librin e saj të dytë: kërkimet e një kosovari për fatin e gruas së tij të zhdukur dhe depërtimi hap pas hapi i tregimtares, në vetë të parë, në bashkëlidhjet komplekse që
qëndrojnë pas kësaj ngjarjeje traumatizuese. Ajo jo vetëm që fillon të njohë jetën e përditshme në zonat konfliktuale shqiptaro-serbe, por, para sa gjithash, asaj fillojnë t’i shfaqen përmasat e mirëfillta të kujtimeve dhe të humbjes së kujtimeve, të jetëshkrimeve të këputura në mes, të “kohës së ngrirë”.
KASTRIOT TUSHA
100 vjet romanca shqiptare
Botimet: “Toena”
Çmimi: 1000 lekë
Mjeshtri i muzikës, Kastriot Tusha, sjell një libër me partiturat e 9 prej romancave më të njohura shqiptare, interpretuar prej tij në koncertin recital “100 vjet Romanca Shqiptare” në kremtimet e 100-vjetorit të Pavarësisë së Shqipërisë. Përveç aktivitetit pedagogjik, ku i është dhënë titulli “Profesor i asociuar”, aktiviteti artistik i Tushës ka qenë shumë i ngjeshur dhe i larmishëm. Ai ka interpretuar dhe vazhdon të interpretojë në të gjitha skenat e vendit, duke përballuar me sukses një repertor të gjerë nga paraklasikët deri te bashkëkohorët. Disa prej roleve të realizuara me nivel të lartë artistik janë: Bepe te “Pagliaci”, Kola te “Paja”, Nadiri te “Peshkatarët e perlave”, Alfredo te “Traviata”, Doda te “Mrika”, Ruizi te “Trovatore”, Duka te “Rigoleto” etj. Ka realizuar mbi 100 koncerte vokale-instrumentale, si dhe një numër të konsiderueshëm koncertesh recitale.
libart-1 librat2 librat-3
Teodor Laço
“Gropas ‘67”
Botimet: ”Tirana Times”
Çmimi: 1000 lekë
Shkrimtari Teodor Laço i është rikthyer vitit 1967 për të shkruar romanin e ri titulluar “Gropas ’67”. Ngjarjet në roman zhvendosen në një fshat të humbur, që autori e quan thjesht Gropas. Aty është kampi i të internuarve. Në këtë vend, një ultësirë si bythë kazani, rrethuar me brinjë kodrinash dhe duna që e ndanin nga deti, rastësia apo fati, i gjeti nën të njëjtën strehë edhe tre njerëz të dëbuar nga kryeqyteti; Zigur Trushin, agjentin e fshehtë të Sigurimit të Shtetit me pseudonimin “Hija”, inxhinierin Vllas Vishnja dhe poetin Miron Konjari. Galeria e personazheve në romanin e Teodor Laços është e gjerë, por rreth këtyre tre njerëzve ndërthuren jetë dhe realitete shqiptare që gjallojnë si të vërtetë.
Robert Musil
Pështjellimet e Tërlesit
Përktheu Jonila Godole
Botimet: “Pika pa sipërfaqe”
I shkruar në moshën 26-vjeçare, Tërlesi është romani i parë i Musilit. Vetëm pas botimit të tij, autori, i cili kishte provuar më parë të merrej me shkenca ekzakte e më pas me filozofi, vendosi t’ia përkushtojë jetën letërsisë. Musili u mor gjithë jetën me shkrimin e një vepre të vetme “Burri pa cilësi”, të cilën nuk arriti ta përfundojë e që sot cilësohet si një nga romanet themelore të shekullit XX. Musili e kupton se thellësia mund të fshihet vetëm në të vetmin vend ku ajo është e durueshme: në sipërfaqe.