Dega e Lidhjes Demokratike të Kosovës(LDK) në Malishevë nuk sheh ndonjë ndryshim tek mënyra e udhëheqjes së pushtetit mes PDK-së dhe kësaj të IQM-së, përkatësisht Nismës për Kosovën, por tek pasojat e kësaj udhëheqjeje.
“Nuk ka ndonjë ndryshim tek pushteti i IQM-së-NPK-së nga ai i PDK-së, ose nëse mund ta quajmë ndryshim mund të themi se në aspektin e qeverisjes dhe situatës së përgjithshme gjendja është edhe më keq tani sesa ka qenë më herët veçmas në disa çështje të ndjeshme”, ka thënë në një konferencë lideri lokal i LDK-së, Januz Kastrati, duke përkujtuar se 3-4 figurat kryesore që e drejtojnë tash pushtetin e Malishevës nën firmën e IQM-NPK-së kanë qenë bashkëpunëtorët kryesorë të kreut të Degës së PDK-së dhe ish-kryetarit të Malishevës.
Nënkryetari i Degës së LDK-së, Sami Kafegjolli, ka tërhequr vërejtjen se kryetari aktual i Malishevës, Ragip Begaj, i ka shkelur premtimet për numrin e bursave për studentë dhe është shfaqur pesimist në lidhje me premtimet e pushtetit të ri rreth kthimit të pronave të Bellanicës. Zëdhënësi i degës, Alban Bytyçi, ndërkaq, ka folur për bursat dhe takimet e kryetarit Begaj me qytetarët e lokaliteteve të ndryshme të Malishevës./Koha Ditore/