Kryetari i Malishevës, Ragip Begaj dhe drejtori për shëndetësi, Hajdin Berisha, në kuadër të takimeve të drejtpërdrejta me banorët e Komunës së Malishevës, mbrëmë kanë takuar banorët e fshatrave, Berishë, Fshat i Ri dhe Tërpezë, me të cilët kanë biseduar për problemet me të cilat ballafaqohen banorët e këtyre fshatrave dhe nevojat që kanë si fshat, në mënyrë që më lehtë të bëhet planifikimi për investime.
Fillimisht Begaj e Berisha, kanë biseduar me banorët për rrezikun nga thumbimi i rriqrave, të cilët janë bartës të etheve hemorragjike krime kongo (EHKK), edhe pse këto fshatra janë më pak të rrezikuara nga virusi i EHKK, për shkak të lartësisë mbidetare, por nuk do të thotë se nuk janë të rrezikuar, për shkak të lëvizjeve që bëhen.
Një temë tjetër, që është biseduar me banorët e këtyre tri fshatrave, është edhe çështja e ambientit, përkatësisht ndotja e ambientit, për çka banorët e këtyre fshatrave, shprehën gatishmërinë e tyre, që t’i bashkohen aksionit për largimin e mbeturinave dhe ruajtjes së ambientit.
Në debat me qytetarët, si nevoja të fshatit dolën, ujësjellësi dhe kanalizimi për fshatin Berishë, trotuaret për nxënësit, pastaj disa rrugë brenda fshatit dhe trajnimi i rasteve sociale, ndërsa në Fshat të Ri, nevojë emergjente është zgjerimi i hapësirës së shkollës, rrethoja e shkollës, pastaj ujësjellësi dhe kanalizimi për fshat. Për këto nevoja, kryetari Begaj, trajtim të drejtë dhe brenda mundësive, zgjidhjen e këtyre problemeve, në kohë sa më të shkurtër.
Ndërsa në Tërpezë, shtrimi i tri rrugëve, në tri lagje, sipas banorëve është nevojë emergjente, ndërsa shprehën gatishmërinë e tyre, për tu futur në sistemin e menaxhimit të ujësjellësit dhe grumbullimit të mbeturinave, ndërsa një shqetësim i madh i banorëve, ishte edhe prerja pa kontroll dhe ilegale e pyjeve (pronë shoqërore), prerje e cila po e dëmton malin seriozisht dhe rrjedhimisht edhe ekosistemin në këto fshatra në Malet e Berishës.
Kryetari Begaj, premtoi se në Tërpezë, do të shtrohen së paku 1500 metra rrugë, për të vazhduar më pas me investime tjera dhe brenda mandatit të tij si kryetar i Malishevës./PrizrenPress.com/