Një shtetas bullgar pritet të gjykohet nga Gjykata e Krimeve të Rënda, pasi akuzohet se trafikuar një vajzë shqiptare. Shtetasi bullgar Tomcho Tomov 56 vjeç në vitin 2009 u martua me një vajzë nga Pogradeci, të cilën më pas e ka keqtrajtuar fizikisht e psikologjikisht, duke e detyruar të bënte prostitutën me klientët që ai vetë i siguronte.
Por, gjatë kësaj kohe vajza shqiptare nuk kishte marrë guximin të denonconte bashkëshortin e saj që e shfrytëzonte si prostitutë. Mësohet se, pas disa vitesh V.Tomov, mbeti shtatzënë me një nga ‘dhunuesit’ e saj dhe ka sjellë në jetë fëmijën.
Por, bashkëshorti bullgar gjithmonë e ka parë vajzën shqiptare si mjet fitimi. Ai kishte bërë një marrëveshje që fëmijën e bashkëshortes t’ia jepte për birësimin një çifti, kundrejt një pagese. Por, nëna shqiptare e fëmijës ka mundur ta ndalojë shitjen e vogëlushit të saj.
Pasi është shfrytëzuar në qytetin e Pogradecit, për disa vite, Tomov ka tentuar ta trafikojë gruan drejt Italisë, me ndihmën e mikut të tij, Alesio Cullhaj, edhe ky i fundit tashmë nën akuzë.
Cullhaj dhe V.Tomov, nuk janë lejuar të kalojnë drejt Italisë dhe pikërisht këtë moment ka shfrytëzuar gruaja për të denoncuar keqtrajtimet barbare dhe tentativën për ta trafikuar drejt shtetit fqinj. Pas denoncimit janë vënë në pranga dy të dyshuarit, të cilët tashmë do të gjykohen në nga drejtësia shqiptare.