Menaxhmenti i ri i Universitetit të Prishtinës “Hasan Prishtina” po synon që përmes një rregulloreje, që është miratuar muajin që shkoi, t’u japë fund parregullsive në rekrutimin e stafit akademik në këtë universitet.
Ka kaluar gati një vit e gjysmë qyshkur kanë nisur procedurat për rekrutimin e asistentëve të rinj në këtë universitet.
Konkursi i shpallur në muajin maj të vitit 2013 ishte përcjellë me një sërë ankesash për shkelje, parregullsi e nepotizëm me theks të veçantë nga kandidatët për asistentë në Fakultetin e Mjekësisë,shkruan Koha Ditore.
Si rezultat i parregullsive të evidentuara, ky proces kishte ngecur deri më tani, kur komisionet recensuese nga njësitë akademike kanë filluar të aktivizohen dhe të shqyrtojnë për të tretën herë dokumentet e kandidatëve për asistentë bazuar në rregullore dhe formularë të rinj.