Qeveria shqiptare pranon se nuk është realizuar Marrëveshja e Ohrit.
Pikërisht vetëm disa javë para përvjetorit të 13 të kësaj marrëveshje, kryeministri Edi Rama kishte lëshuar një deklaratë të fuqishme se kjo marrëveshja nuk është zbatuar plotësisht.
“Ç’ka po ndodh sot në Maqedoni, meriton vëmendje, maturi pa dyshim, reflektim dhe madje të thellë”, tha Kryeministri, transmeton INA.
“Marrëveshjes së Ohrit nuk i kanë dalë për zot vetëm dy palët që përbëjnë Maqedoninë, maqedonasit dhe shqiptarët, por edhe garantët e asaj marrëveshjeje, miqtë dhe partnerët e besuar ndërkombëtarë”, kishte deklaruar një muaj më parë kryeministri Rama.
Ai ka nënvizuar qartë moszbatimin e kësaj marrëveshje, duke kërkuar reflektim dhe maturi.
“Dhe nëse maturia ju duhet shumë dy palëve tona, reflektimi i thellë nevojitet të jetë trepalësh, sepse as burgosja e përjetshme e 6 shqiptarëve dhe as radikalizmi, trajtimi i namur i një radikalizmi fetar që i bie ndesh interesave shqiptare, nuk mund të justifikohen. Por këto janë pasoja të moszbatimit të plotë të Marrëveshjes së Ohrit dhe të një humbjeje besimi tek shqiptarët, për të cilat garantët nuk duhet t’i kërkojnë të gjitha shkaqet jashtë sferës së përgjegjësive të tyre. Ashtu si kundër besoj unë, edhe flamujt e radikalizmit shqiptar nuk ngrihen mbi shkopinj, por mbi plagë sociale, gërryese, varfëri, papunësi, keq arsimim dhe izolim, të cilat shkaktojnë reaksione nga më agresivet, në organizmin shoqëror të një bashkësie dhe për këto duhet menduar në tre palë për Maqedoninë, për këto duhet diskutuar në shumë palë për Ballkanin”, theksoi Rama.